Ян (Жан, Янус) Аселейн, вядомы па мянушцы Маленькі краб (Crabbetje, Krabbetje) (каля 1610, Дзьеп, Францыя — 1 кастрычніка 1652, Амстэрдам) — мастак і малявальшчык Залатога стагоддзя галандскага жывапісу. Пейзажыст, анімаліст, баталіст.
Нарадзіўся ў Дзьепе ў сям’і французскага гугенота Жана Аселейна. У 1621 годзе з сям’ёй перасяліўся з Францыі ў Амстэрдам. Вучыўся ў Эсаяса ван дэ Вэлдэ. Падарожнічаў па Францыі і Італіі. У 1635—1642 жыў у Рыме, дзе стаў членам таварыства мастакоў «Пералётныя птушкі». У ліку яго вучняў — Жак Куртуа, якому ў 1640 годзе ў Фларэнцыі мастак даваў урокі батальнага жывапісу, і Фрэдэрык дэ Мушэрон.