У Вікіпедыі ёсць артыкулы пра іншых асоб з прозвішчам Красінскі. Ян Андрэй Красі́нскі (польск.: Jan Andrzej Krasiński; 14 жніўня 1550, в. Шчукі, Мазовія — 13 красавіка 1612) — польскі гісторык.
Паходзіў са шляхты. Вучыўся ў Венскім і Рымскім езуіцкіх калегіумах, універсітэце ў Балонні (1570—72). 3 сярэдзіны 1570-х г. у Рэчы Паспалітай, займаў розныя царкоўныя пасады, прыдворны караля Стафана Баторыя. Суправаджаў яго ў час Лівонскай вайны (1558—83), выконваў дыпламатычныя даручэнні. У 1573 апублікаваў прамову аб выбранні на трон Генрыка Валезы (панегірык каралю і Францыі). Для яго напісаў галоўную сваю працу «Палонія» — першае друкаванае палітыка-геаграфічнае апісанне Рэчы Паспалітай. Кніга вызначалася змястоўнасцю і багаццем матэрыялу, у ёй аўтар ухваляў дзяржаўны лад Рэчы Паспалітай як шляхецкай рэспублікі. Твор адыграў значную ролю ў фарміраванні на Захадзе ўяўленняў пра Рэч Паспалітую. Нарыс Я. А. Красінскага пра Лівонскую вайну не захаваўся.