Якаў Барысавіч Зэльдовіч (руск.: Зельдович Яков Борисович; 20 ліпеня 1869, Навагрудак — 15 мая 1949, Ленінград) — савецкі вучоны ў галіне хірургіі, марфалогіі. Доктар медыцынскіх навук (1896), прафесар (1922). Заслужаны дзеяч навукі РСФСР. Пачынальнік выкарыстання рэнтгенаўскага выпраменьвання ў анатамічных даследаваннях.
Скончыў у 1893 годзе медыцынскі факультэт ІМУ. У 1901—1904 гадах — супрацоўнік пры кафедры нармальнай анатоміі Санкт-Пецярбургскага жаночага медыцынскага інстытута; у 1904—1906 гадах старшы ардынатар ваенна-палявога запаснога шпіталя ў Маньчжурыі; у 1906—1922 гадах — старшы празектар кафедры нармальнай анатоміі Санкт-Пецярбургскага жаночага медыцынскага інстытута. Адначасова ў 1914—1918 гадах загадваў адным з часовых лазарэтаў у Санкт-Пецярбургу; у 1922 годзе — прыват-дацэнт кафедры аператыўнай хірургіі Дзяржаўнага інстытута медыцынскіх ведаў (ДІМВ). У 1922—1949 гадах загадваў кафедрай нармальнай анатоміі ДІМВ (2-га Ленінградскага медыцынскага інстытута, Ленінградскага санітарна-гігіенічнага медыцынскага інстытута).