Эдынбургскі вазапісец (англ.: Edinburgh Painter) — умоўная назва старажытнагрэчаскага майстра па лекіфу з яго роспісам, што захоўвае музей у горадзе Эдынбург, Шатландыя.
Звестак пра Эдынбургскага вазапісца захавалася мала. Ён паходзіў з Атыкі і працаваў у чорнафігурнай тэхніцы вазапісу. На пачатак 21 стагоддзя знойдзена і атрыбутавана, як творы гэтага майстра каля ста ваз. Назву атрымаў па твору, які зберагае Нацыянальны музей Шатландыі ў горадзе Эдынбург. Пераважна мастак распісваў лекіфы, гідрыі і леканы (менавіта гэтыя тыпы ваз пераважаюць сярод знойдзеных узораў).
У стылістычнай манеры Эдынбургскага майстра працавалі вазапісцы Дыясфос і вазапісец Сапфо, магчыма, яго вучні.