У Вікіпедыі ёсць артыкулы пра іншых асоб з прозвішчам Пятровіч. Эдуард Аляксандравіч Пятровіч (нар.11 лютага 1939, Жодзіна) — беларускі вучоны-эканаміст, аграрнік, кандыдат сельскагаспадарчых навук, прафесар, заслужаны работнік сельскай гаспадаркі БССР.
У 1961 г. скончыў агранамічны факультэт Беларускай сельскагаспадарчай акадэміі. З 1961 г. працаваў глебазнаўцам, загадчыкам аддзела угнаенняў, Магілёўскай абласной станцыі хімізацыі (1961—1976 гг.). У 1973 г. абараніў кандыдацкую дысертацыю па спецыяльнасці «аграхімія» на тэму «Уплыў фосфарных і калійных угнаенняў на ўраджай бульбы ў сувязі з аграхімічныя ўласцівасцямі дзярнова-падзолістых глеб Магілёўскай вобласці». З 1976 па 1986 Э. А. Пятровіч працаваў у партыйных і савецкіх органах: намеснікам загадчыка сельгасаддзела Магілёўскага абкама КПБ (1976—1978 г.), старшынёй Крычаўскага райвыканкама (1978—1979), першым сакратаром Кіраўскага райкама КПБ (1979 г. — 1980 года г.), загадчыкам сельгасаддзела Магілёўскага абкама КПБ (1980 г — 1982 г.). У 1982 г. накіраваны на вучобу ў Акадэмію грамадскіх навук пры ЦК КПСС (г. Масква), якую скончыў з адзнакай ў 1984 г. па спецыяльнасці «эканоміка, арганізацыя кіравання і планавання народнай гаспадаркі». У 1983 адкліканы з АОН і прызначаны на пасаду першага намесніка старшыні Магілёўскага аблвыканкама — старшыні абласнога аграпрамысловага камітэта. З 1986 года па 1993 Э. А. Пятровіч працаваў загадчыкам кафедры арганізацыі сельскагаспадарчай вытворчасці БСГА. Чытаў студэнтам эканамічнага факультэта поўны лекцыйны курс «Арганізацыя вытворчасці ў сельскагаспадарчых прадпрыемствах» і «Асновы прадпрымальніцтва», кіраваў навуковымі даследаваннямі па механізме рэфармавання сельскагаспадарчых прадпрыемстваў у рынкавыя формы гаспадарання. Вынікі даследаванняў ўкаранёны ў шэрагу гаспадарак рэспублікі, выдадзены рэкамендацыі па стварэнні гаспадарчых структур рынкавага тыпу. У 1989 г. атрымаў вучонае званне дацэнта. З 1993 па 1999 года працаваў прарэктарам БСГА па навуковай рабоце, а са 1999 г. — прарэктарам па павышэнні кваліфікацыі і перападрыхтоўцы кадраў. Зараз прафесар кафедры аграбізнесу. У 2001 г Э. А. Пятровічу прысвоена вучонае званне прафесара па спецыяльнасці «эканоміка». Пад кіраўніцтвам Э. А. Пятровіча абаронены 2 кандыдацкія дысертацыі. Ён з’яўляецца аўтарам і сааўтарам больш 200 навуковых публікацый, у тым ліку падручнікаў па арганізацыі вытворчасці ў сельскагаспадарчых прадпрыемствах, 7 вучэбных дапаможнікаў, 4 манаграфій, 12 рэкамендацый, 38 прац апублікавана ў краінах далёкага замежжа.