Чжу Юаньчжан (храмавае імя Тайцзу; 1328—98) — кітайскі імператар (1368—98), заснавальнік дынастыі Мін.
З сям’і арандатара. У юнацтве быў будыйскім манахам. У 1352 годзе у ходзе «Паўстання Чырвоных павязак» уступіў у атрад паўстанцаў супраць мангольскай дынастыі Юань, з 1356 года узначаліў увесь рух. Аб’яднаў пад сваёй уладай большасць зямель Кітая. У 1368 годзе абвясціў сябе імператарам новай дынастыі (Мін), яго войскі занялі горад Даду (Пекін) і зверглі дынастыю Юань.
Садзейнічаў аднаўленню эканомікі, найперш сельскай гаспадаркі, увёў фіксаваны зямельны падатак, аднавіў і пашырыў ірыгацыйную сетку, змагаўся са злоўжываннямі чыноўнікаў.