Фёдар Вясна (Fiedor Wiesna, Fedor Wesna, Chwiodor Wesna; ? — 1393, Віцебск) — набліжаны баярын Вітаўта, сакольнічы, староста віцебскі (1392—1393). Праваслаўны. Валодаў маёнткам Навасёлак (Novam villam alio nomine in vulgari Nowesyolo)[1] каля Жупран.
Пасля смерці ўдавы Альгерда Ульяны Цвярской (восень 1392), Вітаўт ператварыў Віцебскае княства ў староства (намесніцтва), першым старостай быў прызначаны Фёдар Вясна. Калі Свідрыгайла ў 1393 захапіў горад, які лічыў сваёй «отчынай», Фёдар Вясна быў пакараны смерцю — утоплены ў Заходняй Дзвіне.