У Вікіпедыі ёсць артыкулы пра іншых асоб з прозвішчам Кузьменка. Уладзімір Іванавіч Кузьменка (23 жніўня 1952, в. Хватаўка, Бялыніцкі раён) — беларускі гісторык. Доктар гістарычных навук (2008)[1]. Дацэнт (2001). Даследуе гісторыю Беларусі перыяду Другой сусветнай вайны.
Нарадзіўся ў сям’і служачых. Скончыў гістарычны факультэт БДУ (1975). Найбольшы ўплыў на фарміраванне яго гістарычнага светапогляду аказалі Л. С. Абецэдарскі і А. Ф. Юдзянкоў. У 1988 абараніў кандыдацкую дысертацыю «Участие советской интеллигенции в партизанском движении в Белоруссии (1941—1944 гг.)» (нав. кіраўнік к.г.н. Э. Ф. Языковіч). З 1975 па 1979 працаваў настаўнікам у Эсьмонской СШ Бялыніцкага раена, з 1979 па 1986 малодшы навуковы супрацоўнік, з 1986 па 1989 навуковы супрацоўнік Інстытута гісторыі НАН Беларусі, пазней старшы навуковы супрацоўнік аддзела ваеннай гісторыі і міждзяржаўных адносін ІГ НАН Беларусі. Ад 2007 загадчык Цэнтра гісторыі постіндустрыяльнага грамадства Інстытута гісторыі НАН Беларусі. У 2008 у дысертацыйным савеце пры ІГ НАН Беларусі абараніў доктарскую дысертацыю на тэму «Интеллигенция Беларуси в Великой Отечественной войне (1941—1945 гг.)».