Тэнрэкавыя, тэнрэ́кі (Tenrecidae) — сямейства дробных млекакормячых.
Даўжыня цела 4—20 см (часам да 60), хваста 1—22 см. Нагадваюць вожыкаў. Пыска выцягнута, часам з рухомым хабатком. Цела ўкрыта шчаціннем або іголкамі (падсямейства Tenrecinae). Пярэднія канечнасці карацейшыя чым заднія. На пярэдніх лапах 4 або 5 пальцаў, на задніх — 5. У паўводных відаў на задніх лапах ёсць плавальная перапонка.
Адрозніваецца 10 родаў, 34 віды.[1] Большасць — эндэмікі Мадагаскара. Некаторыя віды (падсямейства Potamogalinae) водзяцца ва Усходняй і Цэнтральнай Афрыцы.
Актыўныя пераважна ўначы і на змярканні. Кормяцца ў асноўным беспазваночнымі. Размнажаюцца раз у год, нараджаюць ад 1—4 да 25 дзіцянят.