Тодар Лемяшонак (13 мая 1915 — 30 кастрычніка 2000) — грамадскі дзеяч беларускай дыяспары ў Вялікабрытаніі.
Нарадзіўся 13 мая 1915 года ў в. Лягезы Мінскай губерні ў Расійскай імперыі (сёння — Валожынскі раён Мінскай вобласці).[1]
Перад пачаткам Другой сусветнай вайны служыў у польскім войску. У 1939 г. трапіў у палон і быў вывезены ў Германію. Па заканчэнні вайны апынуўся ў беларускім лагеры для перамешчаных асобаў, адкуль у 1947 г. выехаў на працу ў Вялікабрытанію.
У Вялікабрытаніі першапачаткова працаваў на сельскай гаспадарцы. Потым пасяліўся ў Брадфардзе. Ад 1947 г. быў сябрам Згуртавання беларусаў у Вялікабрытаніі, актывістам аддзела ў Брадфардзе, у 1976—1991 гг. — старшынём мясцовага аддзела ЗБВБ. Ад 1949 г. быў сябрам Згуртавання беларускіх камбатантаў. Радны БНР у Вялікабрытаніі. Выконваў абавязкі скарбніка Беларускага грамадскага клуба «Сакавік», а таксама шмат гадоў быў адміністратарам Беларускага дома ў Брадфардзе.
Памёр 30 кастрычніка 2000 года. Пахаваны ў Брадфардзе на Scholemoor Сemetery.
Жонка Марыя Лемяшонак.
Тодар Лемяшонак — стрыечны брат маці беларускага паэта Віктара Шніпа.