Тамара Піліпаўна Персікава (нар. 3 студзеня 1952, Хоцімск, Магілёўская вобласць) — беларускі аграхімік, глебазнавец. Доктар сельскагаспадарчых навук (2003), прафесар (2004).
Скончыла Беларускую сельскагаспадарчую акадэмію (спецыяльнасць «Аграхімія і глебазнаўства», 1974; аспірантура, спецыяльнасць «Аграхімія», 1984).
Працавала ў Хоцімскай раённай станцыі абароны раслін (1974—1975), Калгасе «Правда» (1975—1979) і Эксперыментальнай базе «Погодино» (1979—1983) Горацкага раёна Магілёўскай вобласці. Выкладала ў Беларускай дзяржаўнай сельскагаспадарчай акадэміі (з 1983; аграэкалагічны факультэт, у 1999—2012 — дэкан факультэта і адначасова прафесар кафедры аграхіміі, з 2012 — кафедра глебазнаўства, загадчык кафедры).
Навуковыя інтарэсы: даследаванне магчымасці рацыянальнага выкарыстання біялагічнага азоту на дзярнова-падзолістых глебах Беларусі; распрацоўка эколага-фізіялагічных прынцыпаў тэхналогій фарміравання высокапрадуктыўных і ўстойлівых змешаных пасеваў на аснове аптымізацыі мінеральнага харчавання і прасторавага размяшчэння кампанентаў у аграфітацэнозе; навуковае абгрунтаванне сістэмы мерапрыемстваў па зніжэнні адмоўных наступстваў утылізацыі птушынага памёту.
Медаль «Почетный агрохимик» (Расія, 2010), нагрудны знак Міністэрства адукацыі Рэспублікі Беларусь «Выдатнік адукацыі» (2010) і інш.