Сурэй (англ.: Surrey) — гістарычнае і цырыманіяльнае графства ў паўднёвай Англіі, частка рэгіёна Паўднёва-Усходняя Англія, адно з так званых «Хатніх графстваў» (Home Counties). Адміністрацыйны цэнтр — лонданскі бора Кінгстан-апон-Тэмс, хоць гістарычны горад графства — Гілфард. Насельніцтва — 1098300 чалавек (ацэнка 2007 года).
Значную частку тэрыторыі графства займаюць лясы. Ёсць крэйдавыя ўзгор’і. Пагоркі Норт Доўнс перасякаюць Сурэй з захаду на ўсход і дзеляць яго на дзве часткі: паўночную — урадлівую і паўднёвую — пагорыстую і перасечаную. Заходняя частка Сурэя ў значнай ступені пакрыта верасам; на паўднёвым захадзе шмат пагоркаў. Адзіная значная рака — Вэй.