wd wp Пошук: ⬜

Прыгажуні

Прыгажу́ні (Calopterygidae) — сямейства стракоз.

Апісанне

Стракозы сярэдніх памераў, залаціста-зялёныя або сінія. Галава рухомая, вочы фасетачныя, не судатыкальныя. Маюць дзве пары аднолькавых, з густым жылкаваннем крылаў (размах 27—35 мм).

Спосаб жыцця і экалогія

Драпежнікі. Ротавыя органы грызучыя. Дарослыя ловяць насякомых (камароў, мух) на ляту, лічынкі кормяцца дробнымі воднымі беспазваночнымі.

На Беларусі вядомы прыгажуня бліскучая (Calopteryx splendens) і прыгажуня-дзяўчына (Calopteryx virgo). Трапляюцца па берагах рэк і ручаёў, ад вады далёка не адлятаюць.

Яйцы адкладваюць у тканкі водных раслін. Лічынкі падоўжаныя, маюць 3 хваставыя шчэлепы на канцы брушка, развіваюцца ў праточных вадаёмах з ілістым дном і зараснікамі водных раслін. Цыкл развіцця двухгадовы.

Значэнне

Стракозы-прыгажуні і іх лічынкі — корм для рыб і каляводных птушак.

Літаратура

Пісаненка А. Д. Прыгажуні // Энцыклапедыя прыроды Беларусі. У 5-і т. Т. 4. Недалька — Стаўраліт / Рэдкал. І. П. Шамякін (гал. рэд.) і інш. — Мн.: БелСЭ ім. Петруся Броўкі, 1985. — 599 с., іл. — 10 000 экз.
Пісаненка А. Д. Прыгажуні // Беларуская энцыклапедыя: У 18 т. / Рэдкал.: Г. П. Пашкоў і інш.. — Мн.: БелЭн, 2001. — Т. 13: Праміле — Рэлаксін. — С. 59. — 576 с. — 10 000 экз. — ISBN 985-11-0216-4 (т. 13), ISBN 985-11-0035-8.