Полацкі дзяржаўны лясны каледж — дзяржаўная сярэдняя спецыяльная навучальная ўстанова Полацка. Найстарэйшая адукацыйная ўстанова сярэдняй прафесійнай адукацыі ў Рэспубліцы Беларусь (заснавана ў 1921 годзе). Рыхтуе тэхнікаў лясной гаспадаркі і тэхнікаў па азеляненні і добраўпарадкаванні.
У лістападзе 1921 года адкрыўся Полацкі лясны тэхнікум, які размясціўся ў будынку былога Спаса-Еўфрасіннеўскага жаночага епархіяльнага вучылішча, пабудаванага ў 1908 годзе для падрыхтоўкі настаўнікаў царкоўнапрыхадскіх школ.
Пры тэхнікуме быў арганізаваны вучэбна-вопытны лясгас для правядзення вучэбных і вытворчых практык навучэнцаў і доследна-даследчай работы выкладчыкаў. Першы час тэхнікум узначальваў ляснічы Грамоўскага лясніцтва Герман Васільевіч Анікееў. Затым дырэктарам быў прызначаны вучоны-лесавод Макарый Рыгоравіч Сільніцкі, пераведзены пазней у Беларускую дзяржаўную сельскагаспадарчую акадэмію. У час Вялікай Айчыннай вайны тэхнікум быў зачынены, а будынкі яго занятыя пад шпіталь.
4 ліпеня 1944 года Полацк быў вызвалены, а ўжо 15 кастрычніка аднавілася дзейнасць лясной тэхнікума. Выконваючым абавязкі дырэктара быў прызначаны былы выкладчык тэхнікума Іван Пятровіч Дэйніс. З верасня 1953 да 1960 дырэктарам тэхнікума працаваў Аляксандр Паўлавіч Гугнін, які да гэтага быў намеснікам міністра лясной гаспадаркі Літоўскай рэспублікі. Неўзабаве дырэктарам тэхнікума стала Т. А. Ільінская, а пасля яе сыходу на пенсію тэхнікум ўзначаліў В. А. Нікіцін (1968—1983). З 1983 па 2008 год тэхнікум узначальваў Валерый Браніслававіч Галяш.
25 красавіка 2009 года загадам Міністэрства адукацыі Рэспублікі Беларусь «УА Полацкі дзяржаўны лясны тэхнікум» перайменаваны ў «УА Полацкі дзяржаўны лясны каледж».
У 2021 годзе каледж атрымаў новыя будынкі ў цэнтры Полацка каля Пакроўскай царквы і набярэжнай Заходняй Дзвіны, якія да гэтага займаў Полацкі гандлёва-тэхналагічны каледж.