wd wp Пошук: ⬜

Папамабіль

Папамабіль — неафіцыйная назва адмыслова распрацаванага аўтамабіля для публічных паездак Папы Рымскага. Слова ўтворана кантамінацыяй слоў «папа» і «аўтамабіль».

Пасля замаху 13 мая 1981 года Папа карыстаецца толькі адмыслова падрыхтаванымі браніраванымі машынамі.

Кожны аўтамабіль пантыфіка адрозніваецца ўласным нумарным знакам: на таблічках нанесеная абрэвіятура SCV (Stato della Citta del Vaticano - дзяржава і горад Ватыкан) і нумар машыны па парадку. Але па традыцыі, на час публічных паездак на машыну, дзе знаходзіцца Папа, заўсёды прымацоўваецца таблічка SCV 1.[1]

Папамабілі

У 1909 годзе біскуп Нью-Ёрку кардынал Фарлен зрабіў падарунак Папе рымскаму Пію X (ўзначальваў Рымска-каталіцкую царкву з 1903 па 1914 год) - аўтамабіль Itala 20/30. Ад падарунка кіраўнік Святога пасаду не адмовіўся, але набыццём не карыстаўся. Прабег раскошнай машыны за час яго пантыфікату склаў усяго 12 кіламетраў.

Наступны вярхоўны пантыфік паўсюднага Касцёла — Бенедыкт XV таксама ігнараваў аўтамабілі, аддаючы перавагу карэце і паланкіне.

Затое наступны Папа — Пій XI (гады праўлення - 1922-1939) скарыўся тэхнічнаму прагрэсу і не толькі праславіўся вялікім аматарам аўтамабіляў, але і стаў першым Папам рымскім, які самастойна кіраваў машынай. У гаражы пантыфіка знаходзілася шаснаццаць аўтамабіляў розных італьянскіх марак: Bianchi, Fiat, Isotta Fraschini.

У 1929 годзе кампанія Citroen падарыла Папе Рымскаму ў гонар дазволу пакідаць межы Ватыкана Citroen CE6 Lictoria цёмна-бардовага колеру. Папамабіль наездзіў ўсяго 155 км і быў адпраўлены ў музей Museo delle Carrozze.

Першы папамабіль з'явіўся ў [1930](/1930 "1930") годзе і называўся лімузін Nürburg 460 Pullman Popemobile (W08) ад кампаніі [Mercedes-Benz](/Mercedes-Benz "Mercedes-Benz"). Машына была спецыяльна распрацавана для Папы [Пія XI](/Пій_XI,_Папа_рымскі "Пій XI, Папа рымскі"). Гэты Mercedes будавалі амаль два гады, грунтоўна перарабіўшы базавую мадэль 1928 года. [7 чэрвеня](/7_чэрвеня "7 чэрвеня") [1930](/1930 "1930") года Пій XI асабіста апрабаваў падарунак, на працягу гадзіны катаючыся па дарожках вакол свайго палаца.

Пій XII, які заняў прастол у 1939 годзе, атрымаў ад свайго папярэдніка вельмі салідны аўтапарк. Асабліва захапляў новага Папу кабрыялет Mercedes-Benz 320, які з’явіўся ў гаражы Ватыкана ў тым жа 1939 годзе і стаў адной з самых любімых машын пантыфіка.

Пасля вайны Папа [Ян XXIII](/Ян_XXIII,_Папа_рымскі "Ян XXIII, Папа рымскі") часам выкарыстоўваў лімузін Chrysler Crown Imperial. Для кароткіх паездак у летнюю рэзідэнцыю да яго паслугаў была адкрытая чатырохдзвярная Lancia Flaminia і ландоле Mercedes-Benz 300 d.

У верасні [1965](/1965 "1965") года кампанія Daimler-Benz падарыла Папе [Паўлу VI](/Павел_VI,_Папа_рымскі "Павел VI, Папа рымскі") Mercedes-Benz S600 Pullman Landaulet.

Пры Паўле VI ў 1975 годзе ў гаражы Ватыкана з’явіўся і першы пазадарожнік, Toyota Land Cruiser.

Ян Павел II часта карыстаўся адкрытымі пазадарожнікамі - напрыклад, у момант замаху 13 мая 1981 года ён знаходзіўся ў аўтамабілі Fiat Campagnola. У Мехмета Алі Агджа атрымалася параніць пантыфіка, і з гэтых часоў Папа карыстаўся толькі адмыслова падрыхтаванымі машынамі: браніраванымі папамабілямі.

Першым стаў Land Rover 109, пабудаваны ў 1982 годзе, - з адмысловым куленепрабівальным празрыстым каўпаком, які закрывае ўсю заднюю частку машыны. Па такім жа прынцыпе пазней быў пабудаваны папамабіль Range Rover, які ў 1982 годзе выкарыстоўваўся Папам падчас свайго візіту ў Англію.

У час візіту ў Іспанію ў [1982](/1982 "1982") годзе Ян Павел II выкарыстаў аўтамабіль, у аснове якога ляжаў [SEAT Marbella](/SEAT_Marbella "SEAT Marbella"). Аўтамабіль быў унікальным і выкарыстоўваўся толькі адзін раз.

Але самым вядомым быў [Mercedes-Benz G-класа](/Mercedes-Benz_G-klasse "Mercedes-Benz G-klasse"), які аб'ездзіў са сваім гаспадаром практычна ўвесь свет. Такіх машын, знешне практычна ідэнтычных, было дзве. Першы Mercedes-Benz 230 G (серыя 460) пабудавалі ў [1980](/1980 "1980") годзе, спецыяльна да візіту Яна Паўла II ў Германію. Але пасля замаху патрабаванні да бяспекі прыйшлося пераглядаць настолькі сур'ёзна, што другая машына, якая з'явілася ў 1982 годзе, была адпраўлена на дапрацоўку ў нямецкі горад Брэмерхафен, дзе сіламі невялікай фірмы Thiele Fahrzeugbau GmbH была ўзмоцнена бранёй і спецыяльным куленепрабівальным шклом.

У [2002](/2002 "2002") годзе для публічных выездаў кіраўніка каталіцкай царквы Папы рымскага Яна Паўла II быў распрацаваны новы папамабіль на базе пазадарожніка [Mercedes-Benz M-клас](/Mercedes-Benz_ML-klasse "Mercedes-Benz ML-klasse"). Так як Папа ў апошнія гады жыцця моцна хварэў і перасоўваўся ў інвалідным крэсле, то ў задняй частцы ML-папамабіля меліся адмысловыя апарэлі, па якіх крэсла Папы заязджалі прама ў салон.

З [2007](/2007 "2007") года Папа [Бенедыкт XVI](/Бенедыкт_XVI,_Папа_рымскі "Бенедыкт XVI, Папа рымскі") карыстаецца нямецкім 296-моцным кабрыялетам [Mercedes-Benz G-klasse](/Mercedes-Benz_G-klasse "Mercedes-Benz G-klasse"). Таксама ў Бенедыкта XVI ёсць яшчэ два папамабіля ад Mercedes-Benz: M- і S-класа.[[2]](/Папамабіль#cite_note-NUMpapa2-2)

Цікавыя факты

У маі 2005 года [VW Golf](/VW_Golf "VW Golf"), які некалі належыў кардыналу Ёзэфу Ратцынгеру (Josef Ratzinger), цяперашняму Папу рымскаму [Бенедыкту XVI](/Бенедыкт_XVI,_Папа_рымскі "Бенедыкт XVI, Папа рымскі"), быў прададзены на электронным аўкцыёне eBay за 190 тысяч еўра.[[3]](/Папамабіль#cite_note-NUMpapa3-3)

Зноскі

1. ↑ http://auto.km.ru/content/istoriya-papamobilya-ot-karety-do-elektromobilya Архівавана 9 снежня 2010. Гісторыя «папамабіля»: ад карэты да электрамабіля(руск.)
2. ↑ http://autozine.info/archives/94 Архівавана 5 красавіка 2012. Аўта журнал: Папамабіль для Папы Рымскага(руск.)
3. ↑ http://www.vokrugsveta.ru/telegraph/technics/512/(руск.)

Спасылкі

• АўтаРэвю - 2005/№12(337)/ “Яго Высокапраасвяшчэнства…”(руск.)
• Аўта журнал: Папамабіль для Папы Рымскага Архівавана 5 красавіка 2012.(руск.)
• Гісторыя «папамабіля»: ад карэты да электрамабіля Архівавана 9 снежня 2010.(руск.)

Тэмы гэтай старонкі (2):
Катэгорыя·Ватыкан
Катэгорыя·Аўтамабілі