Палёўка земляная, палёўка падземная (Microtus subterraneus) — від грызуноў сямейства хамяковых.
Даўжыня цела да 10, хваста да 3,8 см. Па колеру поўсці падобная да палеўкі звычайнай з больш яркім бурым адценнем.
Пашырана ў Еўропе, Малой Азіі, на Каўказе. Сустракаецца на Украіне, у Варонежскай, Курскай, Цвярской, Валагодскай абласцях Расіі. На Беларусі зрэдку трапляецца ў Белавежскай пушчы, на поўдні Палесся. Жыве ў зарасніках кустоў, на ўскрайках шыракалістых лясоў, на палях.
Корміцца жалудамі, каранямі, насеннем травяністых раслін. Робіць запасы корму на зіму ў норах.
Жыве ў норах. Штогод 3—4 прыплоды, па 3—4 дзіцяняці ў кожным.