Нэ́цке[1] — мініяцюрныя разныя фігуркі з Японіі. Мелі ўтылітарную функцыю і служылі для зашпільвання кімано, у якім не было кішэняў.
Асноўнымі матэрыяламі для вырабу нэцке былі корань дрэва (самшыт), бамбук, слановая костка, а таксама зубы і іклы кітоў, маржоў, рогі аленя і інш.
З’явіліся ў 17 стагоддзі з росквітам гарадскога насельніцтва і заставаліся папулярнымі да 1880-х гадоў, калі кімано як паўсядзённае адзенне выйшла з ужытку.
Фігуркі нэцке выразаліся ў форме сямі багоў шчасця, у форме звяроў, кветак, пладоў, часам яны адлюстроўвалі сцэны з паўсядзённага жыцця.
Адрозніваюць наступныя віды нэцке:
катаборы (形彫) — кампактныя, круглявыя скульптуры
анаборы (穴彫) — полыя, ракавінкападобныя скульптуры
мэн (面) — нэцке з выявай галавы альбо маскі (часта маскі но)
сасі (差) — стрыжнепадобныя альбо пазногцепадобныя нэцке
мандзю (饅頭) — круглявыя, гузікападобныя нэцке з рэльефам
р’юса (柳左) — падобныя да «мандзю», але праразаюцца наскрозь
кагамібута (鏡蓋) — мініяцюрны гаршэчак з накрыўкай з траўленага металу
каракуры (からくり) — нэцке з рухомымі часткамі або схаваным сэнсам