Мураца́н (арм.: Մուրացան, сапр. Грыгор Тэр-Аванесян, арм.: Գրիգոր Տէր-Յովհաննիսեան; 13 снежня 1854, г. Шуша, Нагорны Карабах — 25 верасня 1908) — армянскі пісьменнік.
Скончыў епархіяльную школу (1873, г. Шуша). З 1878 года ў Тбілісі. Друкаваўся з пачатку 1880-х гадоў. У ранніх творах прапагандаваў хрысціянскую мараль. У аповесцях «Ноеў воран» (1899), «Апостал» (1902) і інш. — складанасць сацыяльнага становішча армянскага сялянства, у шматлікіх апавяданнях і рамане «Цэнтр адукацыі» (1892) — побыт і норавы гарадской буржуазіі. Аўтар гістарычнага рамана «Геворг Марзпетуні» (1896, выд. 1912) пра драматычны лёс армянскага народа ў X стагоддзі, п’есы «Рузан» (паст. 1882, выд. 1900).