«Минское русское слово» — штодзённая грамадска-палітычная газета вялікадзяржаўнага шавіністычнага кірунку, якая выходзіла ў Мінску з 17(30) чэрвеня 1912 па 28 лютага (13 сакавіка) 1913 на рускай мове. Газета з’яўлялася органам Усерасіскага нацыянальнага саюза, рэдактар Л. Цвяткоў.
Абвяшчала сябе органам «правага рускага друку», «незалежнай палітычнай, літаратурнай і эканамічнай газетай», якая грунтавалася на прынцыпах «самадзяржаўя, праваслаўя і народнасці». Працягвала праграму газет «Минское слово» і «Минские ежедневные ведомости». Падтрымлівала палітыку ўрада Расіі, царскую ўладу. Друкавала самадзейныя гімны, прысвечаныя цару, напісаныя Л. Цвятковым і мясцовымі чыноўнікамі. Адмаўляла нацыянальную і культурную самастойнасць беларускага народа, рабіла нападкі на газету «Наша Ніва», беларускіх пісьменнікаў і беларускую мову (3 і 11.8.1912, 8.11.1912). Узводзіла паклёп на беларускі народ (13.1.1913). Выступала за забарону беларускага друку.
У апошнім нумары перадала сваю праграму газеце «Северо-Западная жизнь».