Марцін Чалфі (англ.: Martin Chalfie; 15 студзеня 1947, Чыкага, штат Ілінойс) — амерыканскі нейрабіёлаг, лаўрэат Нобелеўскай прэміі па хіміі (2008) разам з Асаму Сімамура і Роджэрам Цьсенам за адкрыццё і развіццё выкарыстання зялёнага флуарэсцэнтнага бялку (GFP). Член Нацыянальнай акадэміі навук ЗША (з 2004).
Марцін Чалфі нарадзіўся ў сям’і гітарыста Элі Чалфі (1910-1996) і ўладальніцы галантарэйнай крамы Віўен Фрыдлен (1913-2005), у сям’і яўрэйскіх эмігрантаў. Бацькі бацькі, Бенджамін і Эстэр Чалфі (Халфі), імігравалі ў Цынцынаці з Брэста; дзед па матчынай лініі, Меер Фрыдлен, нарадзіўся ў Маскве.
Сярэднюю адукацыю атрымаў у Чыкага. Скончыў Гарвардскі ўніверсітэт (1969); там жа ў 1977 годзе атрымаў доктарскую ступень па нейрабіялогіі. У цяперашні момант - прафесар біялогіі ў Калумбійскім універсітэце.