Мазавецкае княства (польск.: Księstwo Mazowieckie) — адно з пяці княстваў, на якія падзялілася Польшча ў 1138 годзе паводле тэстаменту Баляслава Крывавуснага. Першым мазавецкім князем стаў Баляслаў Кучаравы, сын Баляслава Крывавуснага і вярхоўны князь польскі ў 1146–1173 гады. Далей княствам амаль чатыры стагоддзі кіравала мясцовая галіна Пястаў. Калі ў 1526 годзе, не пакінуўшы спадчыннікаў, памёр Януш III Мазавецкі, княства было далучана да Польшчы як Мазавецкае ваяводства.