Лі Цінчжаа (李清照; 1084 – 1155) — кітайская паэтэса.
Паходзіла са знатнай сям’і, атрымала класічную адукацыю. У 1101 годзе вышла замуж за гісторыка і антыквара Чжаа Мінчэна. У 1129 годзе яе муж памёр. Лі Цінчжаа ў адзіноце паслілася ў Ханчжоу (правінцыя Чжэцзян).
Сама сябе назвала Лі Цінчжаа “блазнаватай пустэльніцай”. Усмешка і слёзы, жарсць і пакуты, бясконцыя ўзрушэнні адлюстраваліся ў яе творчасці. “Уся стракатая гама эмоцый тонка і ўразліва паўстае з яе вершаваных радкоў, якія хвалююць і нас, сучасных, амаль праз тысячу гадоў”, – так ахарактарызавала творчасць кітайскай паэтэсы XII стагоддзя Дар’я Нечыпарук.
На белаускую мову яе творы перакладалі Анэля Тулупава, Яўгенія Янішчыц, Ніна Загорская, Валянціна Коўтун, Вольга Іпатава, Юлія Алейчанка, Валерыя Радунь, Раман Мышкоўскі.