У Вікіпедыі ёсць артыкулы пра іншых асоб з прозвішчам Стасевіч. Лілія Яфрэмаўна Стасе́віч (22 кастрычніка 1921, г. Калуга, РСФСР — 9 чэрвеня 1999) — беларуская актрыса, дыктар радыё. Заслужаны артыст Беларускай ССР (1965).
Скончыла ў 1941 годзе Рэспубліканскае тэатральнае вучылішча ў Мінску. З 1944 года актрыса Беларускага тэатра імя Я. Купалы. У 1948—1980 гадах дыктар на Беларускім радыё, выкладала ў Беларускім тэатральна-мастацкім інстытуце (1956—1963, 1971—1975).
Член Беларускага саюза тэатральных дзеячаў з 1968 года.
Вяла грамадска-палітычныя, літаратурна-драматычныя, музычныя і інш. перадачы, святочныя рэпартажы. Выступала як чытальнік, у рэпертуары пераважалі творы беларускіх пісьменнікаў.