Ларан Лафорг (фр.: Laurent Lafforgue; нар. 6 лістапада 1966, Антані) — французскі матэматык. У 2002 годзе за доказ гіпотэзы аб адпаведнасці Лэнглендса для агульнай лінейнай групы над полем функцый быў удастоены Філдсаўскай прэміі (другім лаўрэатам быў У. А. Ваяводскі). Брат Венсана Лафорга.
Удзельнічаў у Міжнародных матэматычных алімпіядах 1984 і 1985 гадоў і выйграў сярэбраныя медалі. У 1986 годзе паступіў у Вышэйшую нармальную школу ў Парыжы, з 1990 года працаваў ва ўніверсітэце Парыж-Поўдзень XI і CNRS. У 1994 годзе пад кіраўніцтвам Жэрара Ламона абараніў дысертацыю на ступень Ph.D. У 2000 годзе Лафорг быў прызначаны дырэктарам даследаванняў у CNRS і пастаянным прафесарам Інстытута вышэйшых навуковых даследаванняў (IHES), таксама ў гэтым годзе ён быў узнагароджаны Прэміяй Матэматычнага інстытута Клэя.