wd wp Пошук: ⬜

Казімір Аляксандр Пацей

У Вікіпедыі ёсць артыкулы пра іншых асоб з прозвішчам Пацей.

Казімір Аляксандр Пацей (14 мая 1666 — 10 чэрвеня 1728) — дзяржаўны і ваенны дзеяч Вялікага Княства Літоўскага. Харунжы троцкі (1692—1700), кашталян віцебскі (1700—1703) і троцкі (1703—1705), ваявода віцебскі (з 1705). Быў таксама старостам рагачоўскім, суражскім і жыжморскім.

Ваенная і палітычная дзейнасць

Падчас Хатняй вайны падтрымліваў рэспубліканцаў. Удзельнік канфедэрацыі войска ВКЛ 1696 супраць Сапегаў, бітвы пад Алькенікамі. У студзені 1701 на чале шляхецкага апалчэння разбіў 16 конных харугваў Сапегаў і атрады сялян, якія былі ўзброены Сапегамі.

Выступаў за абсалютную ўладу Аўгуста II. Удзельнік Сандамірскай канфедэрацыі, прыхільнік Расіі ў барацьбе супраць шведскага караля Карла XII. У 1708 часова перайшоў на бок караля Станіслава Ляшчынскага, у 1709 зноў далучыўся да Аўгуста II.

Сям’я

Прадстаўнік шляхецкага роду Пацеяў герба «Вага», сын Леанарда Габрыэля, віцебскага ваяводы, і Рэгіны з Агінскіх. Меў брата Людвіка Канстанціна, які стаў вялікім літоўскім гетманам.

Быў двойчы жанаты: спачатку з Ганнай Тэрэзай Летаў, а пасля яе смерці — з Францішкай Халецкай. Пакінуў дзяцей:

Антонія (? — 1749), вялікага літоўскага стражніка;
Аляксандра (? — 1770), троцкага ваяводу;
Міхала (? — 1787), старосту рагачоўскага і жыжморскага;
Барбару, жонку вялікага літоўскага пісара Юзафа Бжастоўскага;
Тэрэзу, жонку кароннага стольніка Ігнацыя Гумецкага.

Крыніцы

Грыцкевіч А. Пацеі // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — С. 420. — 792 с. — ISBN 985-11-0378-0 (т. 2), ISBN 985-11-0315-2.
Генеалогія магнацкіх радоў Рэчы Паспалітай Архівавана 30 кастрычніка 2013.