У Вікіпедыі ёсць артыкулы пра іншых людзей з імем Дыяген. Дыяген Апаланійскі (стар.-грэч.: Διογένης ὁ Ἀπολλωνιάτης, 499/498 да н.э., Афіны — 428/427 да н.э.) — грэчаскі філосаф, сучаснік Анаксагора. У 420-я гады да н.э. жыў і вучыў у Афінах. Лічыцца, што яго вучэнне парадыраваў Арыстафан у «Аблоках» у 423 годзе да н.э. Нягледзячы на тое, што Дыяген жыў у адзін час з Сакратам, афіцыйна ён прылічаецца да дасакратычнай традыцыі.
Як і Анаксімен, Дыяген лічыць першаснай матэрыяй паветра. Уласцівасцямі паветра, акрамя таго, ён лічыць розум і мысленне — якасці, якія Анаксагор прыпісваў сусветнаму розуму, нусу. Усе рэчы, паводле Дыягена, з’яўляюцца прадуктам розных ператварэнняў паветра. Яго вучэнне падагульняе ўсю філасофію іанійскай школы.