Год 1790 (шведск.: Anno 1790) — шведскі гістарычны серыял, падзеі якога разгортваюцца ў Стакгольме канца XVIII стагоддзя. Паказ першай серыі серыяла адбыўся ў Швецыі на тэлеканале SVT1 24 кастрычніка 2011 года.
Юхан Густаў Дод вяртаецца дадому з руска-шведскай вайны 1788—1790 гадоў, падчас якой ён служыў у арміі фельчарам. Праз выратаванага ім Сімона Фройнда, які да вайны быў выхавальнікам дзяцей у сям’і Вальстэтаў, ён знаёміцца з кіраўніком сям’і Карлам Фрэдрыкам Вальстэтам, які займае пасаду стакгольмскага паліцмайстара. У гэты час вызваляецца пасада квартальнага на адной з акруг Стакгольма, і ён прызначае Дода на гэтую пасаду. Начальнік турмы Нурдзін спадзяваўся сам атрымаць гэтую пасаду, таму ў яго асобе Дод атрымаў сабе ворага.
У кожнай серыі Дод з дапамогай Фройнда раскрывае розныя злачынствы, якія адбываюцца ў сталіцы. Падчас сваёй працы ён сутыкаецца з людзьмі, якія знаходзяцца пад уплывам ідэй Французскай рэвалюцыі, а таксама прыхільнікамі піетызму. Яго жыццё ўскладняецца глыбокім пачуццём, якое ён адчувае да жонкі Вальстэта Магдалены.