Во́лхаў — вялікая рака на паўночным захадзе Еўрапейскай часткі Расіі, у Наўгародскай і Ленінградскай абласцях.
Адзіная рака, якая выцякае з возера Ільмень. Волхаў працякае па Прыільменскай нізіне, упадае ў Ладажскае возера. Даўжыня ракі 224 км, плошча вадазбору 80,2 тыс. км². Сярэдні расход вады 593 м³/с (па некаторых дадзеных 586 м³/с). Ледастаў з канца лістапада па пачатак красавіка. Суднаходная. Галоўныя прытокі: справа — Вішэра, Пчэўжа, Аскуя; злева — Керэсць, Цігада.
На рацэ пабудавана Волхаўская ГЭС (Ленінградская вобласць).