Валянцін Воднік (славенск.: Valentin Vodnik; 3 лютага 1758, Згорня-Шышка — 8 студзеня 1819, Любляна) — славенскі паэт. Дзеяч нацыянальнага адраджэння, асветнік.
Атрымаў багаслоўскую адукацыю. Быў рэдактарам і адзіным аўтарам першай славенскай газеты («Lublanske novice od všich krajov cęliga svęjta», 1797—1800). Выступіў рэфарматарам школьнага навучання, склаў школьную граматыку, слоўнік і інш. Вершы публікаваў з 1781 года. Яго зборнік «Вершаваныя досведы» (1806) утрымліваў першыя славенскія вершы, напісаныя жывой народнай мовай. Воднік абуджаў пачуццё нацыянальнай самасвядомасці, аднаўляў эпізоды народнай гісторыі (ода «Уваскрашэнне Ілірыі», 1811), апрацоўваў гумарыстычныя бытавыя сюжэты.