Бі́тва пры Каране́лі, Каране́льская бі́тва (англ.: Battle of Coronel, ням.: Seegefecht bei Coronel) — марская бітва Першай сусветнай вайны, якая развярнулася паміж брытанскімі і германскімі крэйсерамі 1 лістапада 1914 года паблізу чылійскага порта Каранель.
У ходзе бітвы брытанская эскадра контр-адмірала Крыстафера Крэдака была разбіта германскай эскадрай графа Максіміліяна фон Шпее. Германскія крэйсеры, якія мелі перавагу ў хуткасці і артылерыйскім узбраенні, занялі спрыяльную пазіцыю і практычна без страт патапілі браняносныя крэйсеры «Гуд Хоуп» і «Монмут», разам з якімі на дно пайшлі 1654 брытанскіх марака, уключаючы адмірала Крэдака. «Глазга» і «Атранта» здолелі ўцячы.