Бібліятэка Ашурбаніпала — найбуйнейшая захаваная бібліятэка старажытнага свету і наогул найстаражытная з усіх вядомых бібліятэк[1]. Складалася на працягу 25 гадоў у асірыйскай сталіцы Ніневіі па загадзе цара Ашурбаніпала (VII ст. да н.э.) Служыла таксама дзяржаўным архівам. Пасля смерці цара фонды былі рассеяны па розных палацах. Выяўленая археолагамі частка бібліятэкі складаецца з 25 000 гліняных таблічак з клінапіснымі тэкстамі. Адкрыццё бібліятэкі ў сярэдзіне XIX стагоддзя мела велізарнае значэнне для разумення культур Месапатаміі і для дэшыфроўкі клінапісу.