Не блытаць з Брачыслаў Ізяславіч.
Брачысла́ў ІІ Полацкі (? — сярэдзіна ХІІІ стагоддзя) — князь віцебскі (? — 1242), князь полацкі (1232—1242). Паходзіў з роду віцебскіх князёў Васількавічаў.
Згадваецца Наўгародскім Першым летапісам. Спачатку быў толькі віцебскім князем, у 1232 годзе заняў полацкі сталец пасля 10-гадовага панавання ў Полацку смаленскага князя. Выдаў сваю дачку Васілісу замуж за тымчасова наўгародскага князя Аляксандра Яраславіча, вяселле адбылася ў Тарапцы ў 1239 годзе[1]. Верагодна, тым жа часам другую сваю дачку выдаў замуж за Таўцівіла. Магчыма, яго сынам быў пазнейшы полацкі князь Канстанцін. Пасля Брачыслава полацкі сталец заняў яго зяць Таўцівіл.