Арцы́рыя (Arcyria) — род слізевікоў сямейства арцырыевых.
Вегетатыўнае цела (плазмодый) белае, шэрае, ружова-чырвонае. Спарангіі вышынёй 1—3 мм, цыліндрычныя, авальныя або круглаватыя, жоўтыя, чырвоныя, ружовыя, на кароткіх ножках, скучаны ў групы. Капіліцый (асобныя ніці ў спарангіях) сеткавы са спіральнымі патаўшчэннямі і малюнкам на паверхні валокнаў. У спелых спарангіях верхняя частка адпадае, ніжняя застаецца ў выглядзе дробненькіх кубачкаў. Споры дыяметрам 6—9 мкм, шарападобныя, амаль бясколерныя, гладкія ці дробнашыпаватыя.
Вядома некалькі дзясяткаў відаў, пашыраных па ўсім зямным шары. На Беларусі найбольш вядомы арцырыя паніклая (Arcyria nutans) і арцырыя аголеная (Arcyria denudata). Сапратрофы. Растуць у лясах, на гнілых дрэвах, ламаччы, пад карой пнёў, на апалым лісці.