Анатоль Яфімавіч Кашапараў (нар. 15 кастрычніка 1950, Мінск, БССР) — беларускі спявак (тэнар), саліст ВІА «Песняры», Заслужаны артыст Беларускай ССР (1979).
Дэбютаваў ў 1967 годзе як вакаліст гурта «Сінія гітары» Беларускага політэхнічнага інстытута (Мінск), студэнтам якога быў у той час. Выступы адбываліся ў рэстаране гасцініцы «Інтурыст». Падчас аднаго з выступаў быў заўважаны У. Мулявіным і ў 1971 годзе запрошаны ў склад ансамбля «Песняры», у якім выступаў да 1989 года. Праславіўся выкананнем песні «Волагда» ў ВІА «Песняры». Таксама выканаў песні ў мультфільме «Квака-задавака» (1975).
Пасля сыходу з «Песняроў», перад ад’ездам у ЗША (1991), выступаў у складзе гурта «Поп-сіндыкат».
Вучыўся ў музычным вучылішчы ў Маладзечне. Скончыў Беларускі політэхнічны інстытут, Маскоўскі інстытут культуры, а таксама ГИТИС (1989) па спецыяльнасці «Эстрадная рэжысура».