У Вікіпедыі ёсць артыкулы пра іншых асоб з прозвішчам Каган. Анатоль Маісеевіч Каган (10 жніўня 1945, в. Еткуль Чалябінскай вобласці — 26 верасня 2013, Горкі) — беларускі эканаміст, прафесар, доктар эканамічных навук.
У 1963 годзе скончыў Горацкую СШ № 2. У 1968 г. з адзнакай эканамічны факультэт Беларускай сельскагаспадарчай акадэміі. Пасля працаваў кіраўніком навукова-даследчага сектара акадэміі, а ў 1970—1974 гадах — галоўным эканамістам калгаса імя Жданава Горацкага раёна.
У 1974 г. А. М. Каган паступіў у вочную аспірантуру пры кафедры арганізацыі вытворчасці ў сельскагаспадарчых прадпрыемствах акадэміі. У 1976 г. абраны на пасаду асістэнта кафедры арганізацыі вытворчасці ў сельскагаспадарчых прадпрыемствах і пераведзены ў завочную аспірантуру. У 1979 г. абараніў дысертацыю на суісканне вучонай ступені кандыдата эканамічных навук. З 1981 г. працуе у акадэміі старэйшым выкладчыкам і дацэнтам. У 1987 г. яму было прысвоена вучонае званне дацэнта.
У 2006 г. абараніў доктарскую дысертацыю на тэму: «Фарміраванне рыначнага механізму гаспадарання ў аграпрамысловым комплексе Беларусі». Прафесар з 2007 г.
З 2007 г. працаваў прафесарам кафедры аграбізнесу і дэканам эканамічнага факультэта Беларускай дзяржаўнай сельскагаспадарчай акадэміі.
Навуковыя даследаванні А. М. Кагана прысвечаны распрацоўцы тэарэтычных і метадалагічных асноў фарміравання і эфектыўнага функцыянавання рыначнага механізму гаспадарання ў аграпрамысловым комплексе. Ім распрацавана мадэль аптымізацыі прапорцый фондаў накаплення і спажывання і іх структуры ў сельскагаспадарчых прадпрыемствах з удакладненнем крытэрыяў спецыялізацыі і спалучэння галін, а таксама механізм фарміравання і пераразмеркавання даходаў удзельнікаў кааперацыйна-інтэграцыйных аграпрамысловых аб’яднанняў, парадак вызначэння іх доляй у прыбытку на аснове нарматыўна-размеркавальнага метаду ацэнкі ўкладу пэўных аграпрамысловых структур у вытворчасць канчатковага прадукту.
Пад кіраўніцтвам Кагана А. М. абаронены 3 кандыдацкія дысертацыі. Ён аўтар больш за 200 навуковых і навукова-метадычных прац. Частка прац надрукавана ў Англіі і Польшчы.
Узнагароджаны знакам Міністэрства адукацыі Беларусі «Выдатнік адукацыі».