Рамі Саід Малек (англ.: Rami Said Malek; нар. 12 мая 1981, Лос-Анджэлес, Каліфорнія, ЗША) — амэрыканскі акцёр егіпецкага паходжання. Вядомасць яму прынесла роля Эліята Алдэрсана ў тэлесерыяле «Містар Робат», за якую ён атрымаў прэмію «Эмі». Лаўрэат прэмій «Залаты глобус» (2019), Гільдыі кінаакцёраў ЗША (2019), BAFTA (2019) і «Оскар» (2019) за галоўную мужчынскую ролю ў фільме «Багемская рапсодыя».
Рамі Малек таксама вядомы па ролях другога плана ў такіх фільмах і серыялах, як трылогія «Ноч у музеі» (2006—2014), «Ціхі акіян» (2010), «Змярканне. Сага: Досвітак — Частка 2» (2012) і «Кароткі тэрмін 12» (2013).