Parnassius apollonius — дзённы матылек з роду Parnassius, сямейства Паруснікі (Papilionidae).
Размах крылаў 51-72 мм. Даўжыня пярэдняга крыла 37-45 мм[1]. Асноўны фон крылаў самцоў — чыста белы, у самак — з шэрымі лускавінкамі[1][2]. Уздоўж вонкавага краю крылаў размяшчаецца шэраг чорных плям з выразнымі контурамі. Чорныя плямкі ля краю задняга крыла ў асноўным круглявыя, як і чырвоныя. Чырвоныя плямы на крылах з цёмнай аблямоўкай. Іх колькасць вар’іруе ад 5 да 7 на кожным крыле[1].
Матылёк шырока распаўсюджаны ў горных масівах Сярэдняй Азіі і на паўднёвым усходзе Казахстана. Арэал распасціраецца ад паўднёва-заходняй Сібіры — Кастанайская вобласць, Какчатаўская вобласць у Казахстане, на поўдзень — Заходні Алтай: адгор’і Нарымскага і Курчумскага хрыбтоў Тарбагатай, Саўра, Джунгарыя, Цянь-Шань і Паміра-Алай[3].
Сустракаецца на добра прагрэтых камяністых схілах у перадгор’ях на вышынях 400—1000 м н.у.м[3]. У Какчатаўскай вобласці сустракаецца ў стэпах на схілах пагоркаў і надпоймавых тэрас. У годзе дае адно пакаленне[3]. Час лёту з мая да першай паловы чэрвеня[3].
Вусень чорны, аксаміцісты, з двума яркімі чырвонымі плямамі на кожным з сегментаў. Харчуецца на Pseudosedum lievenii, Sedum, Scabiosa.[3].