Anyphaena accentuata — адзін з нешматлікіх еўрапейскіх відаў павукоў сямейства Anyphaenidae[1].
Самка даўжынёй ад 4,5 да 8,5 мм, самец ад 4 да 6,5 мм. Самец і самка падобныя, але яе афарбоўка значна больш яркая, а ногі даўжэйшыя.
Шырока распаўсюджаны ў Еўропе, ад Партугаліі да Скандынавіі, ад Расіі да Міжземнаморскага рэгіёну. У тым ліку сустракаюцца ў Беларусі.
Гэтыя павукі жывуць на дрэвах і хмызняках у лісці і парастках, дзе і палююць на працягу ночы на дробных насякомых (двухкрылых, тлю)[1]. Любіць вільгаць[2]. Самкі з’яўляюцца актыўнымі аж да восені, а затым знаходзяць прытулак у розных хованках блізка да зямлі.
Спарванне адбываецца ў пачатку лета. Пры гэтым самцы прыцягваюць самак гукам і вібрацыяй, якую ствараюць шляхам частых націскаў брушкам аб паверхню ліста. Коканы, напоўненыя яйкамі, самкі хаваюць у згорнутым лісці і доўгі час ахоўваюць[1].