Юзаф Масальскі (польск.: Józef Massalski; 1800, в. Белічаны, Ігуменскі павет, цяпер Бярэзінскі раён — пасля 1840) — польскі пісьменнік, удзельнік нацыянальна-вызвольнага руху.
3 роду Масальскіх, брат Э. Масальскага. Кандыдат філасофіі. Вучыўся ў Магілёўскай гімназіі, скончыў Полацкую езуіцкую акадэмію (1818). Служыў гувернёрам у Ю. Славацкага ў Вільні. У 1823 арыштаваны як член тайнага студэнцкага таварыства філаматаў. За ўдзел у паўстанні 1830—31 сасланы ў Сібір.
Аўтар аповесці «Яцак» (1823), зборніка «Паэзія» (Вільня, т. 1—2, 1827—28), у якіх адбілася беларуская тэматыка, папулярных баек, эпіграм, песень, у т.л. «Далібог, скажу маме…», музыку да якой напісаў С. Манюшка (1842).