У Вікіпедыі ёсць артыкулы пра іншых асоб з прозвішчам Рот (значэнні).
Элвін Эліёт Рот (нар. 19 снежня 1951) — амерыканскі эканаміст, прафесар Гарвардскага ўніверсітэта, выкладае ў Гарвардскай школе бізнесу. Унёс значны ўклад у тэорыю гульняў, тэорыю ўладкавання рынку і эксперыментальную эканоміку. У 2012 годзе быў удастоены сумесна з Лойдам Шэплі Прэміі Шведскага дзяржаўнага банка па эканамічных навуках памяці Альфрэда Нобеля за «тэорыю стабільнага размеркавання і практыкі ўладкавання рынкаў».
Элвін Эліёт Рот нарадзіўся ў Нью-Ёрку, у яўрэйскай сям’і; яго бацькі былі настаўнікамі. Вучыўся ў сярэдняй школе імя Марціна Ван Бюрэна ў Квінсе, але кінуў яе ў пятнаццацігадовым узросце. Наведваў курсы інжынераў пры Калумбійскім універсітэце і ў рэшце рэшт быў залічаны на інжынернае аддзяленне ўніверсітэта, пасля заканчэння якога (1971) прайшоў магістратуру і аспірантуру пры Стэнфардскім універсітэце (1974), спецыялізуючыся на даследаванні аперацый.