Чорны неон (Hyphessobrycon herbertaxelrodi) — рыба сямейства харацынід.
Даўжыня да 4—5 см. Вельмі прыгожая рыба. Спінка аліўкавая, карычневая. Ад жаберных крышак да хваставога плаўніка ідзе бліскучая залаціста-зялёная палоса, пад ёй — шырокая чорная палоса з неакрэсленым ніжнім краем, якая пераходзіць на хваставы плаўнік (адсюль назва). Брушка светлае. Плаўнікі празрыстыя, спінны і анальны жаўтавата-ружовыя.
Пашыраны ў вадаёмах Балівіі і Бразіліі. У Еўропу завезены ў 1960-я гады. Акварыумная рыба. Гадуюць у акварыумах з мяккай вадой і зацененымі ўчасткамі.