Хасіп (Хасып)[1] — від хатняй барановай каўбасы, традыцыйнай для ўзбекскай і таджыкскай кухні.
Для прыгатавання каўбасы выкарыстоўваюцца барановыя кішкі, якія начыняюць здробненымі барановым мясам, барановым ліверам(руск.) бел. (печань, селязёнка, ныркі), курдзючным салам, рысам і цыбуляй, якія прыпраўляюць чорным перцам і зірай(руск.) бел.[2].
Свежыя барановыя кішкі перасыпаюць соллю, прамываюць некалькі разоў вадой, ветраць, старанна чысцяць і яшчэ раз прамываюць. Субпрадукты таксама старанна вымочваюцца і ачышчаюцца працяглы час, каб прыбраць іх характэрны барановы пах і рэшткі крыві. Мяса і астатнія складнікі традыцыйна рубяцца нажом або сечкай, але ў сучасных умовах часцей прапускаюцца праз буйную рашотку мясарубкі. Рыс і цыбуля дадаюцца сырымі.
Абавязковымі інгрэдыентамі начыння з’яўляюцца бараніна, селязёнка, курдзючнае сала(руск.) бел., рыс і цыбуля — усё гэта здрабняецца, разводзіцца вадой да паўвадкага стану і напіхваецца ў барановую кішку не вельмі шчыльна, паколькі рыс падчас варкі павялічваецца ў аб’ёме і можа разарваць кішку. Часам у хасып дадаюцца таксама лёгкія, пячонка і ныркі барана. Гэту страву гатуюць, калі забіваюць барана і маюць патрэбу выкарыстаць усе субпрадукты. На базарах ва Узбекістане прадаюцца гатовыя наборы для хасіпа, якія ўключаюць кішкі і асноўны лівер, а мяса, тлушч і астатнія інгрэдыенты пакупнік можа падабраць на свой смак і рэцэпт[3].
Хасіп можа даводзіцца да гатоўнасці на пару, але часцей варыцца, каб атрымаць смачны булён. Падчас прыгатавання кішку праколваюць у некалькіх месцах, каб захаваць форму каўбасы і прадухіліць разрыў кішкі. Існуе варыянт так званага хасіп-кебабу, калі ўжо начыненыя каўбаскі нанізваюцца на шампур і смажацца над вуглямі[4].
На стол хасіп падаецца парэзаным са здробненай сырой цыбулей і булёнам са свежай зелянінай. У гарачым выглядзе хасіп ядуць як асноўную страву, а ў халодным могуць падаваць у якасці закускі.
Часам страву па рэцэпту хасіпа гатуюць з ялавічыны і ялавічных субпрадуктаў з абавязковым выкарыстаннем курдзючнага сала, але традыцыйны рэцэпт не ўключае такіх варыяцый.
Існуе самастойная страва з булёну ад варкі хасіпа. Яго працэджваюць, адварваюць у ім гародніну (цыбулю, моркву, памідоры і бульбу), потым дадаюць зеляніну і парэзаны хасіп. Такі суп называюць хасіп шурпа (хасіп шурва)[5].