Уборацкае падняцце (ад назвы вёскі Уборак у Лоеўскім раёне) — тэктанічная структура ў Лоеўскім, Брагінскім і Хойніцкім раёнах Гомельскай вобласці, ва ўсходняй частцы Капаткевіцка-Велікаборскай ступені Прыпяцкага прагіну, на мяжы з Брагінска-Лоеўскай седлавінай. Выяўлена сейсмаразведкай у 1968 годзе.
Па падсалявых адкладах падняцце — паўднёва-ўсходняя найбольш высокая частка блока (15×6 км) паўночна-заходняга распасцірання, абмежаванага на ўсходзе Лоеўскім разломам, на паўночным усходзе і паўднёвым захадзе — двума лакальнымі разрывамі. Паверхня падсалявых дэвонскіх адкладаў манаклінальна апускаецца на поўнач ад -1800 да -3000 м і больш. Паўднёва-ўсходняя частка блока адносна суседняга з ім Майскага блока паднята на 200 м, адносна Брагінска-Лоеўскай седлавіны апушчана на 500 м. Па міжсалявых задонска-ялецкіх адкладах і адкладах, якія ляжаць вышэй, падняцце не выражана. Магчыма, яно сфарміравалася ў познефранскі час позняга дэвону.