«Сын Саула» (венг.: Saul fia) — мастацкі фільм 2015 года рэжысёра Ласла Немеша[en]. Галоўную ролю выканаў Геза Рорыг[en][14].
Дзеянне фільма адбываецца ў кастрычніку 1944 года ў канцлагеры Асвенцім (Аўшвіц-Біркенау). Саул Аўслендэр (Геза Рорыг[en]) уваходзіць у зондэркаманду — адмысловую групу яўрэяў-вязняў, якім нацысты даручаюць выконваць частку дапаможных прац, звязаных са знішчэннем людзей у газавых камерах і спальваннем іх целаў і адзення. Саул становіцца сведкам таго, як нацысцкі лекар забівае выжылага ў газавай камеры хлопчыка, у якім, як яму здаецца, ён прызнае свайго сына. Ён вырашае, што хлопчыка трэба пахаваць з яўрэйскай малітвай (кадышам), і для ажыццяўлення гэтага спрабуе знайсці равіна. Па ходзе справы іншыя члены зондэркаманды даведваюцца, што нацысты збіраюцца іх усіх хутка знішчыць. У надзеі выратавацца яны пачынаюць падрыхтоўку ўцёкаў, у якую таксама аказваецца ўцягнуты Саул. У выніку ўцёкаў у групы зняволеных атрымоўваецца выбрацца за межы канцлагера, у тым ліку Саулу, які нясе на сабе мяшок з целам хлопчыка.
Паводле інфармацыі сайта «Internet Movie Database» фільм быў адзначаны 66 кінаўзнагародамі і яшчэ 62 намінацыямі[15].