Страчок[1], Глузд[2] (Gyromitra) — род сумчатых грыбоў сямейства Дысцынавыя (Discinaceae).
Пладовыя целы (апатэцыі) шапкавыя. Шапка няправільна-акруглая, звіліста-маршчакаватая (у смарчка асенняга — лопасцева-седлападобная), з глыбокімі складкамі, у выглядзе камячка змятага аксаміту, каштанава-карычневая, часта з прырослым да ножкі краем, пустая. Ножка звычайна кароткая, няправільных абрысаў, пустая, крохкая, белая, часам з фіялетавым адценнем. Споры эліпсоідныя, гладкія, бясколерныя, з дзвюма каплямі масла на канцах.
Пашыраны ва ўмераным поясе Паўночнага паўшар’я, у т. л. на Беларусі. Сапратрофы. Растуць пераважна на пясчанай глебе ў хваёвых лясах.
Адрозніваюцца 3 віды; страчок гіганцкі (Gyromitra gigas) і страчок звычайны (Gyromitra esculenta) — вясеннія грыбы, страчок асенні (Gyromitra infula) пладаносіць увосень.
Умоўна ядомыя грыбы, спажываюцца сушаныя. Часта іх блытаюць з ядомымі смаржкамі (Morchella spp.).