Рычард Брэнт Талі (англ.: Richard Brent Tully; нарадзіўся ў 1943) — астраном з Астранамічнага інстытута[en] ў Ганалулу (Гаваі, ЗША).
Спецыялізацыя Талі — астрафізіка галактык. Разам з Дж. Рычардам Фішэрам[en], у працы Новы метад вызначэння адлегласцей да галактык[5], ён увёў вядомую залежнасць Талі-Фішэра[en] паміж яркасцю спіральных галактык (прапарцыйнай масе іх зорак) і амплітудай іх ратацыйных крывых. Гэта залежнасць дала магчымасць рабіць даволі дакладныя ацэнкі адлегласцей да галактык. Складзены ім у 1988 годзе Каталог блізкіх галактык (англ.: The Nearby Galaxies Catalog) утрымлівае трохмерныя каардынаты 68 тысяч найбліжэйшых да Зямлі галактык. На аснове гэтых даных была пабудавана мадэль размяшчэння галактык у кубе з бокам у 700 мільёнаў светлавых гадоў і з цэнтрам у Зямлі. Візуалізацыя гэтых даных была аформлена ў выглядзе камп’ютарнай праграмы-планетарыя «Starry Night Pro[en]», даныя ў якой называюцца Базай Талі (англ.: Tully Database). У гэтай базе знаходзіцца гіперструктура, якой Талі даў назву «комплекс звышскопішчаў Рыб-Кіта»[6][7].
У 2014 годзе Талі склаў трохмерную карту гравітацыйна звязанага звышскопішча, якое змяшчае наша Звышскопішча Дзевы, і назваў яго Ланіякея.