Палац Лінлітгау (англ.: Linlithgow Palace) — палац у Шатландыі ў вобласці Заходні Лоціян. Размешчаны ў 24 км на захад ад Эдынбурга паміж горадам Лінлітгау і возерам Лінлітгау. Палац быў улюблёнай рэзідэнцыяй Сцюартаў. У ім нарадзілася Марыя Сцюарт.
У 1424 годзе Якаў I пачаў адбудоўваць палац Лінлітгау пасля пажару, які знішчыў былы будынак. Лінлітгау стаў па-сапраўднаму шыкоўным «фешэнэбельным палацам», прыемным прыпынкам для каралеўскай сям’і падчас падарожжа па дарозе, якая злучала Эдынбургскі замак і замак Стэрлінг.
Старадаўні палац стаў «каралеўскай дзіцячай» для Якава V (нарадзіўся ў 1512 г.), Марыі Сцюарт (нарадзілася ў 1542 г.) і прынцэсы Елізавета (нарадзілася ў 1596 г.), больш вядомай, як «Зімовая каралева». Пасля 1603 года, калі Якаў VI перанёс свой каралеўскі двор у Лондан услед за сваёй каранацыяй, як Якава I Англійскага, палац хутка заняпаў. У верасні 1745 з-за неасцярожнага абыходжання з агнём яго апошніх пастаяльцаў, прадстаўнікоў Гановерскай дынастыі, адбыўся пажар, і будынак быў знішчаны. У нашы дні велічны каралеўскі палац Сцюартаў у Лінлітгау стаіць без даху, у запусценні.