Нго Бао Цяу (в’етн. Ngô Bảo Châu; нар. 28 чэрвеня 1972, Ханой, Паўночны В’етнам) — в’етнамскі матэматык (мае падвойнае грамадзянства В’етнама і Францыі). Найбольш вядомы сваім доказам так званай фундаментальнай лемы ў праграме Лэнглендса.
Замежны член Французскай акадэміі навук (2015).
Нго — сын прафесара фізікі В’етнамскага інстытута механікі. Першы в’етнамец — пераможца двух Міжнародных матэматычных алімпіяд 1988 і 1989 гг. (першую з іх скончыў са стопрацэнтным вынікам — 42 балы з 42 магчымых).
Пасля заканчэння спецыялізаваных матэматычных класаў пры Ханойскім універсітэце разлічваў атрымаць вышэйшую адукацыю ў Будапешце, але пасля змены рэжыму постсацыялістычны венгерскі ўрад спыніў прымаць в’етнамскіх студэнтаў. У выніку скончыў Вышэйшую звычайную школу ў Парыжы. Працуе ў Інстытуце перспектыўных даследаванняў у Прынстане, Нью-Джэрсі.