У Вікіпедыі ёсць артыкулы пра іншых асоб з прозвішчам Пакроўскі.
Міхаіл Мікалаевіч Пакроўскі (29 жніўня 1868, Масква — 10 красавіка 1932, Масква) — вучоны-гісторык, савецкі партыйны і дзяржаўны дзеяч. Акадэмік АН СССР (1929), АН БССР (1928).
У 1891 годзе скончыў гісторыка-філалагічны факультэт Імператарскага Маскоўскага ўніверсітэта, вучань В. В. Ключэўскага і П. Г. Вінаградава.
З красавіка 1905 года член РСДРП. Актыўны ўдзельнік узброенага паўстання ў Маскве ў час рэвалюцыі 1905—1907 гадоў. З 1908 па 1917 гады жыў у эміграцыі. У жніўні 1917 года вярнуўся ў Расію і аднавіўся ў партыі бальшавікоў. Адыграў важную ролю ў захопе ўлады бальшавікамі ў Маскве ў кастрычніку 1917 года. У пачатку 1918 года удзельнічаў у мірных перагаворах Расіі з Германіяй у Брэсце, выступаў супраць заключэння сепаратнага Брэсцкага міра. З мая 1918 года намеснік наркама асветы РСФСР.