У Вікіпедыі ёсць артыкулы пра іншых асоб з прозвішчам Машкоўскі. Міхал Давыдавіч Машкоўскі (1908, г. Пінск — 2002, г. Масква) — адзін з заснавальнікаў савецкай фармакалогіі, акадэмік Расійскай Акадэміі медыцынскіх навук
Нарадзіўся ў сям’і настаўніка. Закончыўшы Пінскую гімназію, пераехаў у Маскву і паступіў у другі Маскоўскі дзяржаўны медыцынскі ўніверсітэт ім. М.І.Пірагова.
На яго лёс, станаўленне і выбар жыццёвага шляху вялікую ролю адыгралі браты, вядомыя ў сваіх сферах спецыялісты – Якаў Давыдавіч, авіятар і вынаходнік, удзельнік Чалюскінскай аперацыі, старшыня першай у СССР парашутнай школы, які трагічна загінуў падчас іспытаў парашута ўласнай канструкцыі, і Шабсай Давыдавіч – член-карэспандэнт, вядомы інфекцыяніст і эпідэміёлаг.
У 1934 годзе, пасля заканчэння медыцынскага інстытута, быў прызваны на ваенную службу, якую праходзіў у якасці ваенурача другога ранга, навуковага супрацоўніка аддзела фізіялогіі, а пасля таксікалогіі Санітарнага інстытута Чырвонай Арміі. У 1938 годзе пачаў працаваць у лабараторыі фармакалогіі Усесаюзнага навукова-даследчага хіміка-фармацэўтычнага інстытута. Менавіта ў тыя гады захапіўся асаблівасцямі выкарыстання фармакалагічных сродкаў ў практычнай дзейнасці. даследванні былі прысвечаны фармакалогіі дыхання, у выніку чаго з’явілася распрацоўка першых арыгінальных сродкаў – аналептыка цытызіну, што стала грунтам для кандыдацкай дысертацыі.